Təhsil Tələbə Krediti Fondunun əməkdaşları  Gəncə Tibb Kollecinin  tələbələrinin  maarifləndirilməsi istiqamətində görüş keçirib.  Tədbirdə Gəncə Tibb Kollecinin direktoru Mehman Rzayev,  fondun əməkdaşı Abdin Məhəmmədəli , həkim- müəllim və tələbə heyəti iştirak edirdi.       Giriş sözü ilə tədbiri açan əməkdar həkim, Mehman Rzayev dövlətimiz tərəfindən gənclərin təhsil almaları üçün yaradılan münbit şəraitdən danışdı. Direktor vurğuladı ki, bu gün dövlət başçısı İlham Əliyevin və 1-ci vitse prezident Mehriban xanım Əliyevanın diqqət və qayğısı sayəsində həm orta ümumtəhsil məktəblərində, eləcə də otra ixtisas və ali məktəblərdə yüksək şərait yaradılmışdır:

“Bu gün Azərbaycanda keyfiyyətli təhsil və biliklərə yiyələnmək üçün hər şərait var. Kollecimizdə tələbələr üçün yaradılan şərait bunun bariz nümunəsidir. Artıq dövlətimiz sosial müdafiəyə ehtiyacı olan tələbələrin də həm xaricdə, həm də ölkə daxilində yaranan problemlərinin həlli istiqamətində böyük işlər görür. Təhsil kreditinin verilməsi də bu qəbildən olan tədbirlərdəndir” deyə M. Rzayev əlavə edib.

Sonra Fondun əməkdaşı Abdin Məhəmmədəli  çıxış edərək bildirdi  ki, Prezident İlham Əliyev 2021-ci il iyunun 17-də “Azərbaycan Respublikası Təhsil Nazirliyinin tabeliyində Təhsil Tələbə Krediti Fondunun yaradılması və fəaliyyətinin təmin edilməsi ilə bağlı bir sıra tədbirlər haqqında” Fərman imzalayıb. Fərmana əsasən yaradılmış “Təhsil Tələbə Krediti Fondunun Nizamnaməsi” təsdiq edilib və bu fondun yaradılmasında məqsəd əhalinin aztəminatlı təbəqələrindən olan şəxslərin təhsilə əlçatanlığını təmin etmək, təhsil almaqda bərabər imkanlar yaratmaq və təhsilin əhatə dairəsini genişləndirməkdir. Fondun nümayəndəsi tələbələrə TTKF-in fəaliyyət istiqamətləri, Fonda müraciət qaydaları və təhsil tələbə kreditlərinin verilməsi meyarları barədə geniş məlumat verib.

Sonda kollecin tələbələrini maraqlandıran suallar fond nümayəndəsi tərəfindən cavablandırılıb.