Gəncə Şəhər İcra Hakimiyyətinin dəstəyi, YAP Gəncə şəhər təşkilatının təşkilatçılığı ilə Azərbaycan xalqının Ümummilli Lideri Heydər Əliyevin 100 illik yubileyinə həsr olunmuş “Heydər xalqım deyəcək, xalq Heydər söyləyəcək” adlı konsert proqramı təqdim olunub.

    Tədbirdə Gəncə Şəhər İcra Hakimiyyəti başçısı Niyazi Bayramov, YAP İdarə Heyətinin üzvü, YAP Gəncə şəhər təşkilatının sədri Bayram Aslanov, millət vəkilləri Müşfiq Cəfərov, Razi Nurullayev, Türkiyənin və Gürcüstanın Gəncədəki baş konsulları , şəhid və qazi ailələri, Gəncə Tibb Kollecinin rəhbərliyi və həkim-müəllim kollektivi,  ziyalılar,  şəhər ictimaiyyətinin nümayəndələri iştirak ediblər.

   Əvvəlcə tədbir iştirakçıları Ulu Öndər Heydər Əliyevin Gəncə şəhərinin Baş meydanında ucaldılan abidəsini ziyarət edib, önünə tər güllər düzüb, xatirəsinə dərin ehtiram ifadə ediblər.

   Tədbir Azərbaycan Respublikasının Dövlət Himninin səsləndirilməsi, Ümummilli Lider Heydər Əliyevin, Azərbaycanın bütövlüyü uğrunda canından keçən şəhidlərimizin və qardaş Türkiyə dövlətində baş vermiş zəlzələ nəticəsində dünyasını dəyişmiş vətəndaşların xatirəsinin bir dəqiqəlik sükutla yad edilməsi ilə başlayıb.

   Gəncə şəhər İcra Hakimiyyəti başçısı Niyazi Bayramov çıxış edərək, çoxəsrlik dövlətçilik tariximizdə yeni parlaq səhifə açan nadir, bənzərsiz şəxsiyyət Ümummilli Lider, dünya səviyyəli siyasi xadim Heydər Əliyevin xalqımız və dövlətçiliyimiz qarşısındakı tarixi xidmətlərindən danışıb.

          YAP Gəncə şəhər təşkilatının sədri Bayram Aslanov çıxışında müstəqil Azərbaycan dövlətinin banisi, Yeni Azərbaycan Partiyasının qurucusu, müdrik dövlət xadimi Heydər Əliyevin zəngin dövlətçilik irsinə nəzər salaraq bildirib ki, tarixin yaddaşında əbədi iz qoymaq hər insana nəsib olmayan böyük xoşbəxtlikdir. Bu yalnız Heydər Əliyev kimi dahi şəxsiyyətlərin qismətinə düşən taledir.

Tədbirdə Gəncə Tibb Kollecinin  tələbələrinin ifasında Ulu Öndərə ithaf olunmuş mahnılar, musiqi nümunələri tamaşaçılara təqdim edilib. İzləyicilərin sonsuz marağına səbəb olan geniş konsert proqramı hər kəs tərəfindən böyük rəğbətlə qarşılanıb.

  Sonda tədbirdə fəal iştirakına görə özfəaliyyət kollektivləri YAP Gəncə şəhər təşkilatı tərəfindən təşəkkürnamə ilə təltif olunublar.