Tədbir Azərbaycanın Dövlət Himninin səsləndirilməsindən sonra ölkəmizin azadlığı və suverenliyi uğrunda canından keçən şəhidlərimizin və Ümummilli lider Heydər Əliyevin ruhunun bir dəqiqəlik sükutla anılması ilə başladı. Sonra çıxış edən Gəncə Tibb Kollecinin direktoru, əməkdar həkim, YAP ərazi ilk partiya təşkilatının sədri Mehman Rzayev qonaqları salamlayaraq bu yaxınlarda YAP Gəncə təşkilatına sədr seçilən Bayram Aslanovu kollektiv adından təbrik  edərək onun işlərində uğurlar arzuladı. M.Rzayev memarı Ulu öndər Heydər Əliyev olan Yeni Azərbaycan Partiyasının keçdiyi şərəfli yoldan, ümummilli liderin misilsiz xidmətlərindən, dövlətimizin tarixi inkişafından, müstəqil Azərbaycanın qazandığı uğurlardan söhbət açıb. Bildirib ki, Yeni Azərbaycan Partiyası qısa müddət ərzində dünyanın ən nüfuzlu siyasətçilərindən və dövlət rəhbərlərindən sayılan Azərbaycan Respublikasının Prezidenti cənab İlham Əliyevin uzaqgörən siyasət ilə daha da güclənib. 44 günlük Vətən müharibəsində xalqımızın partiyanın sədri, Ali baş komandanın ətrafında bir yumruq kimi birləşərək zəfər çalmasını vurğulayan kollecin direktoru Azərbaycan xalqının öz rəhbərinə dərin hörmət, ehtiram və inamı olduğunu qeyd etdi.

   YAP Gəncə şəhər təşkilatının sədri Bayram Aslanov Yeni Azərbaycan Partiyasının dövlətçiliyimizdə tutduğu mühüm mövqedən danışıb, ölkə Prezidenti cənab İlham Əliyevin tövsiyə və tapşırıqlarının qədim Nizami yurdunda layiqincə yerinə yetirildiyini vurğuladı. Natiq qeyd etdi ki, Gəncə onu uzun illər sonra çox isti və səmimi qarşıladı:

“Mən uzun illər Bakıda fəaliyyət göstərmişəm. Heç təsəvvür edə bilməzdim ki, Gəncədə belə isti və doğma qarşılanacam. Az bir müddətdə iştirak etdiyimiz və təşkil etdiyimiz tədbirlərdə Gəncə Tibb Kollecinin yüksək səviyyədə iştirakını və dəstəyini də xüsusi qeyd etməliyəm. Bu təhsil ocağında yaradılan şərait məni sözün yaxşı mənasında təəccübləndirdi. Burada beynəlxalq səviyyədə təşkil olunan kabinetlər, lazım olan avadanlıqlarla təchiz olunan laboratoriyalar doğrudan da möhtəşəmdir. Bu münbit şərait yaxın gələcəkdə bu tibb təhsil ocağında əsl peşəkarların yetişdiriləcəyindən xəbər verir. Mən bu kollecdə yüksək səviyyədə olan dərsə davamiyyəti və əsl hərbidə olduğu kimi möhkəm nizam-intizami xüsusi vurğulamaq istəyirəm. Bu çox sevindirici və təqdirə layiq haldır” deyə B. Aslanov əlavə edib.

  Sonda YAP Gəncə Təşkilatının sədri Azərbaycan Respublikasının əməkdar həkimi, Gəncə Tibb Kollecinin direktoru, Əməkdar həkim Mehman Rzayevi 60 illik yubileyi münasibətilə təbrik etdi, yubilyarı səmərəli fəaliyyətinə görə fəxri fərmanla, eyni zamanda YAP Gəncə şəhər təşkilarının təşkilatçılıqı ilə təşkil edilmiş “Heydər Xalqım deyəcək,Xalq Heydər söyləyəcək” adlı ümumşəhər konsertinin təşkilində yaxından iştirakına görə isə Gəncə Tibb Kollecini  təşəkkürnamə ilə təltif etdi.