Azərbaycanda orta tibb işçiləri hazirlayan ən qocaman təhsil müəssisəsi olan Gəncə Tibb Kollecində məzun günü keçirilib. Tədbir torpaqlarımızın azadlığı uğrunda canından keçən şəhidlərimizin əziz xatirəsinin bir dəqiqəlik sükutla anılması və Azərbaycanın Dövlət himninin səsləndirilməsi ilə başlayıb. Məzun günündə tələbələri salamlayan kollecin direktoru, əməkdar həkim Mehman Rzayev yüksək keyfiyyətli təhsil almaq üçün tibb təhsil müəssisəsində yaradılan şəraitdən söz açıb. Qeyd edib ki, bu gün dövlətimiz Azərbaycanda səhiyyə müəssisələrinin təmiri və texniki təchizi ilə bərabər, həm də həkim və orta tibb işçilərinin səviyyəsinin yüksəldilməsi istiqamətində məqsədyönlü işlər aparır:

   “1931-ci ildən fəaliyyət göstərən kollecimiz son 5 ildə yüksək səviyyədə təmir olunub və müasir avadanlıqlarla təchiz olunub. Bildiyiniz kimi hazırda 7 ixtisas üzrə tələbələrimiz hazırlanır. Son illər çox yüksək texniki təminatlı laboratoriyalar tələbələrimizə tibbi biliklərə dərindən yiyələnmək üçün imkanlar yaradır.  Maddi-texniki bazanın gücləndirildiyi, təhsilin səviyyəsinin artırıldığı kollecimizdə ötən illərlə müqayisədə əlaçı və zərbəçi tələbələrimizin sayında nəzərə çarpacaq dərəcədə artım var. Bu bizi sevindirir. Gələcəkdə Gəncə Tibb Kollecində təhsilin səviyyəsini daha da yüksəltmək üçün yeni tədbirlər planı işləyib hazırlamışıq. Növbəti tədris ilindən kollecimiz beynəlxalq əlaqələri daha da inkişaf etdirmək, yetirmələrimizin bilik və bacarığının daha da artırılması istiqamətində işlərimizi təkminləşdirmək arzusundayıq. Bu gün sevindirici haldır ki, artıq bizim kollecimizi bitirən məzunlarımızın səsləri nəinki Gəncənin, həmçinin Azərbaycanın bütün tanınmış tibb müəssisələrindən gəlir. Ümidvaram ki, bu gün məzun olacaq yetirmələrimiz gələcəkdə istənilən tibb müəssisələrində yüksək səviyyədə əhaliyə tibbi xidmət göstərə biləcək” deyə M. Rzayev əlavə edib.

     Sonra son təhsil ilində və Gəncə Tibb Kollecinin ictimai həyatında, idman yarışlarında fərqlənən məzunlara fəxri diplomlar təqdim olunub.

Sonda Gəncə Tibb kollecinin  öz fəaliyyət qruplarının ifasında müxtəlif mahnılar və rəqslər nümayiş olundu.