Gəncə Tibb Kollecinin rəhbərliyi 2019/2020-ci tədris ilinin yaz semestri çərçivəsində keçirilən imtahan sessiyası müddətində mütəmadi olaraq tələbələrlə onlayn görüşlər keçirir. Bu barədə məlumatı kollecin direktoru, əməkdar həkim Mehman Rzayev verib. Onun sözlərinə görə tədris müəssisəsində təhsil alan tələbələr iyun ayının 8-dən etibarən yaz imtahan sessiyası çərçivəsində onlayn qaydada şifahi şəkildə imtahan verirlər və demək olar hər imtahandan sonra, bütün qruplarla xüsusi proqramlar üzərindən onlayn şəkildə görüşlər aparır:

“Artıq məlumat verdiyimiz kimi Azərbaycan Respublikası Nazirlər Kabineti yanında Operativ Qərargahın təhsil müəssisələrində fəaliyyətə qoyulan məhdudiyyət ilə əlaqədar Azərbaycan Respublikası Təhsil Nazirinin tövsiyəsinə əsasən Gəncə Tibb Kollecində tələbələr onlayn imtahanlar verirlər. İxtisaslar üzrə bütün qrupların tələbələri üçün müəllimlərimiz tərəfindən onlayn dərslər keçirilib. İmtahanların sualları bütün tələbələrimizə internet vasitəsilə çatdırılıb. Qruplar üzrə bir neçə imtahan arxada qalıb. Vaxtaşırı internet üzərindən müxtəlif proqramlarla görüşlər təşkil edirik. Bu zaman tələbələri narahat edən məsələləri, qarşılaşdıqları problemləri müzakirə edir, onların aradan qaldırılması yollarını birgə araşdırırıq” deyə M. Rzayev əlavə edib.

Pandemiya dövründə, xüsusi karantin rejimində dərslərin onlayn şəkildə tədris olunduğunu bildirən kollecin direktoru bu təcrübənin həm müəllimlər üçün, həm də tələbələr üçün bir ilk olduğunu vurğuladı:

“Bildiyiniz kimi distant təhsil bizim üçün bir ilkdir. Buna baxmayaraq bütün kollektivimiz dərslərin keçirilməsi üçün bütün imkanları səfərbər edib. Kollecimizdə yüksək sürətli internet və smart lövhələr vasitəsilə tələbələr bütün ixtisaslar üzrə dərslər proqram üzrə tədris olunub. Təhsil müəssimizdə son dövrlərdə yaradılmış elektron kitabxananın olması da bu məsələdə çox köməklik edib” deyə direktor bildirib.

Görüşlər zamanı tələbələrin qaldırdığı məsələlərə gəlincə Mehman Rzayev qeyd edib, bütün qarşıya çıxan suallar bir daha araşdırılacaq:

“Yuxarıda qeyd etdiyim kimi onlayr tədris və imtahan kollecimiz üçün bir eksperiment idi. Təbii ki, burada həm müəllimlərimiz, həm də tələbələrimiz üçün bəzi çətinliklər yaranırdı. Nəzərə alsaq ki, kollecimizin tələbələrinin çox hissəsi Azərbaycanın müxtəlif şəhər və rayonlarındandırlar və orada internet üzərindən bağlantılarda bəzi çətinliklər yaşanırdı, belə problemlərin olması təbiidir. Bunu nəzərə alaraq qiymət ala bilməyən tələbələr üçün bəzi fənlər üzrə onlayn icmal dərslərin yenidən tədris olunması və avqust ayında növbəti onlayn imtahanların keçirilməsini nəzərdə tuturuq”.

Gəncə Tibb Kollecinin direktoru imtahan dövründə tələbələrlə onlayn görüş keçirir