Səhiyyə Nazirliyi Gəncə Tibb Kollecində Novruz Bayramı ilə bağlı tədbir keçirilib. Kollecin ictimaiyyətlə əlaqələr şöbəsindən verilən məlumata görə, tədris müəssisənin Gənclər evində təşkil olunan bayram tədbirində Türkiyə Respublikasının Gəncə şəhərində Konsulu Rəcəb Öztop,  vitse-konsul Yiğit Yalın Soyal, kollecin direktoru, əməkdar həkim Mehman Rzayev, kollecin kollektivi və tələbələr qatılıb.

   Qonaqları salamlayan M. Rzayev türk xalqlarının əziz bayramlarından olan Novruz münasibətilə hər kəsi təbrik edərək qeyd edib ki, Novruz bayramı bizə ulu əcdadlarımızın təbiətin əbədi nizamına ehtiramını ifadə edən müqəddəs yadigarıdır. Bu bayram xalqlarımızın qədim və zəngin dünyagörüşünün, gələcəyə nikbin baxışının, bütövlükdə milli varlığımızın dolğun təcəssümü olub, mədəni sərvətlər xəzinəmizdə müstəsna yer tutur. Yad təsirlərdən qoruyaraq layiqincə yaşatdığımız Novruz ənənələri çoxəsrlik keçmişinə daim ehtiramla yanaşan xalqımızın, eyni zamanda, bəşər mədəniyyətinə töhfəsidir.

   Sonra qonaqlara Gəncənin rəmzlərindən olan buxara papaq hədiyyə edilib.

   Tədbir Gəncə Tibb Kollecinin tələbələrinin iştirakı ilə bədii hissə ilə davam etdirilib. Azərbaycan mahnı və rəqsləri, musiqi nömrələri qonaqların ürəyincə olub.

  Sonda bayram iştirakçılarına Novruz sovqatı paylanılıb.