Səhiyyə Nazirliyi Gəncə Tibb Kollecinin həkim-müəllimləri Azərbaycan Fövqəladə Hallar Nazirliyinin Gəncə Regional Mərkəzinin mülki müdafiə şöbəsinin əməkdaşlarının təşkil etdiyi “Məktəblinin dostu” layihəsi çərçivəsində təlimdə iştirakçılar üçün elmi və praktik məşğələ keçiriblər. Kollecin ictimaiyətlə əlaqələr şöbəsi xəbər verir ki, təlimdə Elm və Təhsil Nazirliyinin “Məktəblinin dostu” layihəsinin rəhbəri Bahar İsmayılova, Fövqəladə Hallar Nazirliyi Mülki Müdafiə şöbəsinin, Gəncə Tibb Kollecinin əməkdaşları və Gəncə şəhəri üzrə 6 orta ixtisas məktəblərinin 25 müdavimi dinləyici kimi iştirak ediblər.

  FHN-nin Gəncə Regional Mərkəzinin MM – şöbəsinin əməkdaşı, polkovnik-leytenant Bəhai Nəsirov təlim iştirakçılarını salamlayıb və layihənin əhəmiyyətindən söhbət edib.

  Təlimdə  çıxış edən Səhiyyə Nazirliyi Gəncə Tibb Kollecinin mülki-müdafiə üzrə qərargah rəisi Sevda Abbasova Gəncə Tibb Kollecinin və FHN-nin Gəncə Regional Mərkəzinin işçi heyətinin sıx əməkdaşlıqlarını qeyd edib, kollecin həkim-müəllimlərinin ilkin tibbi yardımın təşkili ilə bağlı keçdikləri dərslərin hər bir zaman maraqla dinlənildiyini vurğulayıb.

  Sonra kollecin həkim-müəllimi Afət İskəndərova İlkin tibbi yardım-Təməl həyat dəstəyi mövzusunda çıxış edib. O, qan axmalar, sınıqlar, bayılmalar dəm qazından zəhərlənmər, qida zəhərlənmələri, yad cismin çıxarılması, süni tənəffüs verilməsi və. s haqqında geniş məlumat verərək manikenlər və insanlar üzərində ilk yardımı əyanı şəkildə iştirakçıların diqqətinə çatdırıb.

  Sonda həkim-müəllimlər təlim iştirakçılarının suallarına ətraflı cavablar verib, maraqlı diskusiyalar aparıblar.