Oktyabrın 19-da Gəncə Tibb Kollecinin direktoru Mehman Rzayevin tələbələrlə görüşü keçirilib. Tədbirdə Gəncə şəhər Gənclər və İdman baş İdarəsinin rəisi Həmid Nəsirov, Gəncə Gənclər evinin müdiri Amil Qurbanov, Gəncə şəhər Gənclər və İdman baş idarəsinin Gənclər sektorunun müdiri Rəşad Əlizadə, Gəncə şəhər İcra hakimiyyətinin nümayəndəsi Yadigar Bədəlov iştirak ediblər.

Görüşdə ilk öncə Vətən müharibəsi Şəhidlərinin  əziz xatirəsi  bir dəqiqəlik sükutla yad edildi. Daha sonra kollecin direktoru Mehman Rzayev bütün tələbələri yeni dərs ilinin başlaması və ənənəvi tədrisin bərpa olunması ilə əlaqədar təbrik etdi:

“Ümidvaram ki, tələbələrimiz onlar üçün yaradılan bütün imkanlardan maksimum istifadə edərək bilikli, bacarıqlı, savadlı bir tibbi kadr kimi yetişəcək və gələcəkdə nəinki Azərbaycanda, ölkəmizin hüdudlarından kənarda da vətəndaşlara  əsl peşəkar kimi xidmət edə biləcəklər”.

Mehman Rzayev həmçinin əlavə etdi ki, hazırda 6 ixtisas üzrə 901 tələbənin təhsil aldığı müəssisədə korpuslar əsaslı təmir edilib, dam örtüyü yenilənib.  Kollecdə mərkəzi istilik sistemi bərpa olunub, idman meydançası yaradılıb. Tədrisin keyfiyyətinin artırılması məqsədilə maddi-texniki bazası da yaxşılaşdırılıb.  Yeni smart lövhələr quraşdırılıb, tədris otaqları internetlə təmin olinub ki, bu da dərs prosesində tələbələrin dərsləri daha da yaxşı qavramasına, lazım gələrsə beynəlxq təcrübələrdən də yararlanmalarına şərait yaradır. Tələbələrin praktik məşğələləri keçməsi və əyani şəkildə biliklərə yiyələnməsi üçün də imkanlar xeyli yaxşılaşdırılıb.

“Hazırda çox müasir laboratoriyalarımız var. Ortopedik stomatologiya, laborator diaqnostika, tibbi profilaktika  ixtisasları üzrə təhsil alan tələbələrimiz bu müasir, yeni avadanlıqlarla təchiz edilən laboratoriyalardan faydalana biləcəklər. Yaxın vaxtlarda bu siyahıya daha bir laboratoriya da əlavə olunacaq ki, burada tibb işçilərinə vacib olan çoxlu sayda tibbi bacarıqları praktik olaraq robot-maniken üzərində həyata keçirə biləcəklər. Yaxın 2-3 il ərzində  kollecimizdə çox yüksək bacarıqlara malik daha da savadlı kadrların yetişəcəyinə ümid edirəm” deyə  əlavə edib.

Görüşdə həmçinin Tələbə Gənclər təşkilatına yeni sədr təyin olundu.