Gəncə Tibb Kollecinin tələbələri Gəncədə keçirilən “Nizami dühası”adlı tədbirdə iştirak etmişdir

Bakı şəhəri  Yasamal  rayon  və  Gəncə şəhər İcra Hakimiyyətlərinin dəstəyi, YAP Yasamal rayon və YAP Gəncə şəhər təşkilatlarının təşkilatçılığı ilə Azərbaycan Milli Konservatoriyası tərkibindəki İncəsənət Gimnaziyası Nizami Gəncəvinin 880 illik yubileyi çərçivəsində mütəfəkkir şairin doğma şəhəri Gəncədə “Nizami dühası” adlı musiqili ədəbi-bədii kompozisiya təqdim edib.

Əvvəlcə Azərbaycanın suverenliyi, ərazi bütövlüyü və torpaqlarımızın azadlığı uğrunda canından keçən şəhidlərimizin xatirəsi bir dəqiqəlik sükutla yad olunub.

YAP Gəncə şəhər təşkilatının aparat rəhbəri Orxan Əhmədov tədbiri açaraq, Gəncədə yaşayıb yaradan dahi Nizami Gəncəvinin Yaxın və Orta Şərq fəlsəfi-ictimai və bədii-estetik düşüncə tarixini zənginləşdirən ecazkar söz sənəti incilərini də məhz bu şəhərdə ərsəyə gətirdiyini dilə gətirib.

Milli Məclisin deputatları Pərvin Kərimzadə və Müşfiq Cəfərov çıxış edərək, dünya ədəbiyyatının görkəmli nümayəndəsi dahi Azərbaycan şairi və mütəfəkkiri Nizami Gəncəvinin bəşəriyyətin bədii fikir salnaməsində yeni səhifə açmasından danışıb. Nadir  şəxsiyyətin xalqımızın mənəviyyatının ayrılmaz hissəsinə çevrilmiş parlaq irsinin əsrlərdən bəri Şərqin misilsiz mədəni sərvətlər xəzinəsində qoruyub saxlandığını qeyd ediblər.
 
YAP İncəsənət Gimnaziyası Ərazi ilk partiya təşkilatının sədri Hicran Sadıqzadə gimnaziya kollektivinin dahi Nizami Gəncəvinin yaşayıb yaratdığı şəhərdə olmalarını, konsert proqramı ilə çıxış etmələrini, gəncəlilər  tərəfindən məmnunluq hissi ilə qarşılandıqlarını qeyd edib.

YAP Gəncə şəhər təşkilatının aparat rəhbəri Orxan Əhmədov kompozisiyanın hazırlanmasına görə gimnaziyanın rəhbərliyinə,kollektivinə minnətdarlığını bildirib.